Uf dr Foto gseht er uus, mit dr Flöige u em Gilet, wi dr Oberchällner im nöi eröffnete Chornhus-Chäller. I Würklechkeit isch dr Claude Longchamps nid Oberchällner, sondern Ober-Hochrächner, u am letschte Sunntig hett er üs wieder emal zeigt, wi me hoch u gäng höcher rächnet.

U de wüsse mer‘s, bevor mer‘s wüsse, u we mer‘s de wüsse, wüsse mer, dass o d Hochrächner nid alls so ganz genau wüsse, bevor si‘s wüsse. Z überlege wär, seit dr Longchamps, öb me bi Abwychige zwüsche Hochrächnig u amtlechem Ergäbnis nid d Hochrächnig für d Sitzverteilig sött berücksichtige. Dr hüttig Mönsch, bsunders dr politisch aktiv Mönsch, seit dr Longchamps, erläbt d Fernsehwürklechkeit mit ihrer Hochrächnig verlässlecher, vertrouter, beruhigender als si schwirigi, widersprüchlechi, mängisch sogar ungloubwürdegi eigeti Würklechkeit. We d Fernsehwürklechkeit mit ihrer Hochrächnig allgemein anerkannt würd, de chönnt me em Chaos ir Politik en Ornig gä, seit dr Longchamps.

Aber so wit hei mers am letschte Sunntig no nid bracht. D Ursula Murer wott e Bundesrat meh, dr Ueli Durrer kene weniger. Dr Franz Koch wott em Adalbert Steinegger e Bundesrat wägnäh u ne dr Ursula Durrer gä. Dr Adalbert Murer wott em Ueli Steinegger e Bundesrat wägnäh u ne em Franz Durrer gäh. Dr Ueli Koch wott sini Bundesrät zrüggzieh. O dr Franz Murer wott sini Bundesrät zrüggzieh. D Ursula Steinegger wott itz nümm. Dr Adalbert Koch wott o nümm. So het me d Zouberformel de doch no chönne rette. Dr wahr Fortschritt ir Schwyz, analysiert dr Longchamps, isch dr Stillstand. Das isch scho gäng so gsi, u das isch o denn no so, we‘s d Schwiz lengschtens nümm git.

D Wahle 1999 si verby u dr Claude Longchamps wird vom Hochrächner wider zum Meinungsforscher. Sit geschter schaffet er a de Wahle 2003. Är het e nöii Methode entwicklet, wo dervo usgeit, dass jedi Schwizere u jede Schwizer, öb rächts oder links, o ds Volksganze i sech treit, wenn o uf unterschiedlechi Art - den einte liegt‘s sametweich uf dr Zunge, den andere schwümmt‘s steihert ir Galle. Dr Demosdetekter, wo me bi irgend ere Pärson mit dr Elektrode am grosse Zäihe rächts u mit dr Antipode em chline Zäihe links aachlemmt, git itz d Wähleraateile vo de Parteie uf zwo Kommastelle genau a. D Fählerquote liegt je nach Gschäftsgang vor Ems Chemie zwüsche null u drü Prozent. Dr Demosdetekter sött me bi Föhn nid im Freie aawände.

Übermorn chunnt di erschti Prognosen use. D Ergäbnis vo de Nationalratswahle 2003 wärde sensationell, seit dr Longchamps. Läset dr „Sunntigs-Blick“.

Uf dr Foto gseht er uus wi dr Che Guevara, wo dä no ke Bart gha het, u o si sim Dänken u Handle glychet er nem, dr Franz Hostettler, dr Presidänt vor RGB - vor Revolutinäre Gnosseschafts-Bewegig, wo vor genau 75 Jahr ggründet worden isch, für ds Radio unter Kontrolle z bringe, wi das alli Befreiigsbewegige mache, wil mit em Radio cha me ds revolutionäre Bewusstsy witergäh. U Schwyzer Radio DRS - Die Revolution siegt - Schwyzer Radio DRS isch o hütt no ds wichtigschten Inschtrumänt vor RGB i ihrem revolutionäre Kampf für d Befreiig vom Mönsch vo sich sälber.

U am hüttige Fröidetag, wo mer 75 Jahr RGB - Revolutionäri Gnosseschafts-Bewegig - dörfe fyre, hütt haltet dr Che Hostettler vor Terrasse vom Kursaal oben abe d Jubiläumsaasprach, u d Lüt, wo dr Che wei ghööre, stöh bis a Gurten ufe, un es chöme gäng meh Lüt, un es drückt dr Gurte hindere vor luter Lüt u gäng wyter hindere bis a Moléson hindere. U wil gäng no meh Lüt chöme, wo dr Che wei ghöre, drückt’s dr Gurte übere Moléson übere, un es isch es riisigs Gstungg vo Bärn bis i ds Waadtland. U wil o itz gäng no meh Lüt chöme, wo dr Che wei ghöre, u ds Gstungg gäng no grösser wird, drückt’s dr Gurte i Gänfersee, u die, wo z hinderscht stöh, drückt’s mit u si müesse nach St.Gingolph übere schwümme.

U itz faht dr Che Hostettler afe rede u seit: Nei, nei u nomal nei. Üses Schwyzer Radio DRS - Die Revolution siegt - chunnt mer nid i das spätkapitalistische Züri, üses Schwyzer Radio DRS blybt i üsem revolutionäre Bärn u kämpft wyter für d Befreiig vom Mönsch vo sich sälber. We mer üses Schwyzer Radio DRS i das Blocher-Loch liesse la gheie, de würde si am Änd no dr Mörgeli engagiere für d Desinformation u dr Walter Frey für d Toyota-Nachrichte u dr Ueli Maurer für d Realsatire. U dr Schlüer würde si zum Radiodiräkter mache, u dä würd üses Schwyzer Radio DRS - Die Revolution siegt - umtoufe i Schwyzer Radio Schwyzerzyt, u ds revolutionäre Bewusstsy wär wäg. Da fragt eine us em Publikum, wär dr Schlüer sig, u dr Che Hostettler seit: Das isch da Nationalrat, wo all drei Wuche statt zum Coiffeur zum Dachdecker mues.

Nei, nei u nomal nei, üses Schwyzer Radio DRS - Die Revolution siegt -, üses Schwyzer Radio DRS blybt i üsem revolutionäre Bärn u kämpft wyter für d Befreiig vom Mönsch vo sich sälber. Daderfür sorget d RGB, die Revolutionäri Genosseschafts-Bewegig, seit dr Che Hostettler. U d Lüt jublen u stampfe vor Begeischterig u mööge Bravo - mi chönnt meine, YB heig gägen FC Tiger Chäsli es Unentschide gmacht.

U itz chunnt eine mit usbreiteten Arme, gsänktem Blick u Träänen i den Ouge ufe Che Hostettler zue u seit: Che, lah mi la Mitglied wärde ir öieren RGB. U dr Che seit: Wohär chunsch de du? U dr ander seit: Vo Züri. U dr Che fragt: Was hesch de dört gmacht? U dr ander antwortet: Mer überleit, win i‘s chönnt mache.

U dr Che Hostettler, wo nid numen en ächte Revolutionär isch, sondern o ne wahre Mönschefründ, leit em Rüegg d Hand uf d Schulteren u seit: Walter, nimm’s nid z traagisch. Überall, wo gschaffet wird, wärde Fähler gmacht. Aber dass mer nid nomal dr glych Fähler machsch.

I bi sit 75 Jahr Mitglied vor RGB u ha a keren einzige Generalversammlig nüt gseit. Di Tradition wett i o hütt nid ungnützt la verstryche.

Zersch wett i e Dank abstatte. Ds letscht Jahr, dir bsinnet nech, ha ni beaastandet, dass d Musig am Radio eifach z lut sig u ds Gredte z lysli. D Musig töni wi ne Boeing 747, wo ni no ds Glattbrugg gwohnt heig, han i gseit, u ds Gredte wi nes Hummeli, wo um nes Söiblüemli umesummeli, schön zwar, aber mi verstöng kes Wort. Drufabe hei si bir Musig d Bäss chli akzäntuiert u ds Gredte um nen Oktave aaghobe. Daderfür möcht i danke, wil siderhär brucheni ke Hörapparat meh. Mi cha also, we me wott.

Hütt wett i öppis säge zum Yschaltquote-Terror. Höret uuf dermit! Mänge geschetzt Mitarbeiter vom Radio u vor allem o vom Fernseh wär froh, es hätt überhoupt niemer ygschalte, wenn öppis von em gsändet wird. Das isch ds einte. Ds anderen isch das, dass ygschalte ha überhoupt no nid losen u luege mues heisse. U kennen eine, wo sit zwöine Jahr si fernseh nümm cha usschalte, wil sech dr Chnopf verchlemmt het u ner ne o mit em Vorschlaghammer nid usebringt. Un i kennen eini, wo ren e Homöopath empfohle het, mit Ultrachurzwälle d Cellulitis wägzmassiere, aber si mües de scho mit Schwyzer Radio DRS derhinder, di Private nützi nüt, di chutzeli nume, mit DRS 2 hingäge bring mer sogar d Hüehnerouge wäg. U all das louft de natürlech o under Yschaltquote. Also höret uuf mit däm Blödsinn.

U itz no zum ene Problem u wi nis glöst ha. Mi sött ja Mitglieder wärbe für d RGB, u i däm Zämehang hätt i am ene Kolleg sölle erkläre, was d RGB überhoupt isch. U du han i nem gseit, d RGB sig e Tregerorganisation vor SRG, si sig also sozsäge d Hosetreger vom Armin Walpen, u grad itz, wo nes nöis Radio- u Fernsehgsetz söll gmacht wärde, sig’s wichtig, dass dr SRG-Generaldiräkter d Hosen anne bhalti. Aber das het mi Kolleg nid so intressiert, u drum ha ni mer überleit, wi ni nem’s chli intressanter chönnt säge. U du han i nem gseit, d RGB sig di beschti Kapitalaalag , wo me sech chönn vorstelle. Mi zahl es einzigs Mal 50 Franke u de gäbs all Jahr ar Generalversammlig Salzstängeli, Salzbrätzeli u Salzmandle, Lachsbrötli, Salamibrötli u Sparglebrötli, Härdopfelsalat, Chabissalat u gmischte Salat, Rohschinke, gkochte Schinke u Bureschinke, wysse Wy, rote Wy u blaue Wy. U da chönn me näh soviel me wöll, u we me gnue näh, heig me no di nächschte drei Tag gnue, das heissi, dass i mi i de letschte 75 jahr zämezellt fasch es Jahr lang vor RGB heig chönnen ernähre, u das für 50 Franke.

Wenn i nümm gwählt würd de wärs dopplet schad, schad für mi u schad für d Schwyz, wil bi mir steit gäng dr Mönsch im Mittelpunkt u d Familien isch mis Hobby. Aber hüttzutags zellt das nümm vil, we me wott gwählt wärde, hüttzutags zellt nume no, was d Medie us eim mache u was men us de Medie macht.

Die zum Byspil, wo ir Arena vom Schwyzer Fernseh DRS, bir Mueterschaftsversicherig, wo se d Bundesrätin Dreifuess fragt, öb si nid o meini, dass grad d Froue - die, wo i däm Momänt, ohni öppis z säge, Alouf nimmt, e dopplete Rückwärtssalto macht u no bevor si wider uf de Bei isch, numen eis seit, nämlech nei, die isch so guet wi widergwählt. Wil settigs schänkt y stimmemässig, u de hei si‘s im „Sport aktuell“ no mal zeigt, git wider öppe tuusig Stimme, u uf Tele 24 hei si‘s nachegstellt mit dr Birgit Steinegger als Bundesrätin Dreifuess, u di Nationalratskollegin het für witeri tuusig Stimme dä dopplet Rückwärtssalto nomal gmacht, aber für TV3 het si ne de nümm chönne mache, wil si itz dr Fuess im Gips het.

Oder o dä isch so guet wi widergwählt, wo d „Schwyzer Illustrierti“ zue nem hei cho isch u si nem gseit hei, für ds Titelbild sött er im ene gälbe Pijama uf ene rote Töff hocke mit ere Pfauefädere im Muu, u de isch er es gälbs Pijama ga choufe u het e rote Töff gmietet u isch i Tierpark d Pfaue ga sueche, aber het se nid gfunde u de het er halt sich sälber e Fäderen usgschrisse. Was machen i äch faltsch, dass d „Schwyzer Illustrierti“ nie bi mir deheim verby chunnt, e gälbi Windjagge u nes rots Velo hätti ämu u Hüehner hei mer o.

Die, wo gäng i de Medie chöme, wärde sicher widergwählt, i hingäge, wo mi Sach im Stille mache, wo ja stimme, we me mues ja stimme u nei stimme, we me mues nei stimme, wil guet abgstummen isch halb politisiert, i wirde vilech nümm gwählt, o we für mi dr...(äh... wär steit itz im Mittelpunkt, aha dr Mönsch) o we für mi dr Mönsch im Mittelpunkt steit u d Familie isch mis Hobby u de hani no nes anders Hobby, ds Wandere mit dr Familie.

Si hei gseit es gäb vilecht e miggerigi Wahlbeteiligung, das chönnt mer nütze, wil da hätte mi nid so vil chönne striche, u kumuliert hätte mi o bire höche Wahlbeteiligung nume weni. D Chüngeler, di hei mi sicher kumuliert, d Kavallerie-Fouriere, die o,aber vo dene git‘s afe nümm vil, ds Bärner Servierpärsonal hingäge, das isch zahlrych u steit gschlosse hinder mer, das gspüren i i jedere Session, wil di hei gmerkt, dass für mi gäng dr Mönsch im... (äh...wo steit itz dr Mönsch, aha im Mittelpunkt) dass für mi gäng dr Mönsch im Mittelpunkt steit.

Wenn i trotzdäm nümm gwählt würd, wär das o ne herte Schlag für Zigerli, Heierli u Chlütterli, mini drei beste Nationalratskollege, wil de hätte si eine zweni zum Jasse. Wenn i nümm gwählt würd, de sit so guet u wählet mi i vierne Jahr wider, wil für mi steit gäng dr..äh...äh... Dings im...äh...äh... Dings.

Oktober 1999