Uf dr Foto gseht er uus wi dä, wo a de Liechtathletik-Wältmeischterschafte, im Marathon, ganz vore mitgloffen isch, aber irrtümlecherwys gmeint het, das sig dr Zähtuusiger u de nach zäh Kilometer nümm wyter grennt isch, sondern nume no dr Ovomaltine-Stand gsuecht het.

I Würklechkeit isch dr Roger Schawinski o so eine, wo partout het wölle gwinne u vilecht o gwunne hätt, aber nid gmerkt het, dass er im faltsche Renne mitlouft. Wär z vil wott, cha plötzlech nümm, wenn er sött, u mues de, was er um ke Prys hätt wölle, nämlech däm verchoufe, wo ner het wölle chönne. Das isch ds Gsetz vor freie Marktwirtschaft: Di Chline, wo gärn grösser wäre, hälfe de Grosse di Gröschte z wärde.

U itz steit er da mit lääre Händ, kes Radio meh u kes Fernseh, nume no 92 lumpigi Milliönli, aber süsch nümm. Derbi heig er Historisches gleischtet, het dr Medieprofässer Blum gseit, u dä mues es ja wüssen als Profässer, Historisches heig er gleischtet, zwar chli illegal, aber historisch, das isch ja gäng so gsi, we sech ir Schwyz usnahmswys öppis bewegt het, de isch es illegal gsi, aber historisch, dänke mer numen a Wilhelm Tell oder a Röbu Grimm oder a Dutti, gar nid z rede vom Divisionär Regli oder vom Regierigsrat Aliesch, bi dene wüsse mer ja no nid, öb's würklech illegal gsi isch.

Dr Schawinski het o als Fernsehmoderator Historisches gleischtet, das de wider ganz legal. Mal het er ire Talk-Show e wärtkonservative Mediepolitiker mit Hut u Haar verschlückt u de wi we nüt passiert wär di Talk-Show mit däm wärtkonservative Mediepolitiker z Änd gfüehrt wi dr Clibi mit dr Karoline. Bire andere Talk-Show het er dr Ernst Mühlemann usgschpöit. So isch dr Mühlemann entstande. Dr Schawinski het dä usgschpöit wi dr Ätna dr Lavastrom u itz spöit dr Mühlemann dr Redestrom uus, solang er no cha, das heisst so langs Tele 24 no git.

Aber es git's nümm lang, wil d Politiker nid hei wölle merke, wi wichtig Tele 24 für d Schwyz u o für di übrigi Mönschheit isch. Vom Bundesrat Leuenberger erwartet dr Schawinski nume no eis: Dass er nem mal z Nacht im eine fischtere Wald begägnet.

O dr Hans-Heiri Coninx het's i dene Tage nid luschtig, wil ne dr Schawinski so vil gkoschtet het. Es mues massiv gspart wärde. Ds Millione-Spiel im TV3 produziere si itz ds Campione, gäng no mit ere Million, aber nümm mit Franke, mit Lire. Ds Facts chunnt nume no schwarz/wyss use u bim Tagi wird dr Stellenazeiger ygschpart. Itz wüsse mer o, warum dr Coninx dr Roger Köppel het müesse verchoufe. Verchouft het er übrigens o si Jacht ar Côte d Azur, aber ganz ohni chan er nid si, drum het er ds Stäfa es Pedalo gleaset. E witeri Sparmassnahm trifft ne ganz bsunders, schänkt aber o rächt y: Er isch vom Grand cru classé uf Beaujolais-Village umgschtige.

Was aber macht itz dr Schawinski? Zersch mal paar Tag Ferie uf em Pizzo Groppero. Am 1. Septämber faht er de als Sektionschef im Bundesamt für Kommunikation a. Är isch dört zueständig für ds nöie Radio- u Fernsehgsetz.

Sorge, nüt als Sorge hei si ir Mediebranche.

Uf dr Foto gseh si uus wi Müllers vo näbedra u Meiers vo obedra u Bünzlis vo undedra u so sy si o i däm Big-Brother-Huus: stinklängwilig. Wo dr Remo mit dr Janine u d Conny mit em Fabian u dr Oli mit dr Mascha u d Daniela mit em Nadim, wo sech alli paaret gha hei, isch es gsi wi bi Müllers, Meiers u Bünzlis deheime, stinklängwilig, u niemer meh het möge luegen u d Yschaltquote isch abgsacket u d Tamedia-Aktie äbefalls. U dr Wildberger het vorübergehend dr Verstand verlore u dr Coninx het vorsorglech Ergänzigsleischtige beaatreit un es isch zum Verzwyfle gsi.

Aber no bevor dr Wildbärger dr Verstand zrügggwunne het, isch er uf di rettendi Idee cho: Flöh! U zwar nid eifach irgend e Floh, sondern dr grossmuulig Tiefstichfloh, dr Pulex irritans coninx. Är vermehrt sech innert 24 Stund um e Faktor drü. So innovativ cha Privatfernseh sy!

Zersch chratzet sech dr Fabian am Buuch. De chratzet sech d Daniela am Po. U de chratze sech alli irgendwo. De chratzet sech dr Remo überall. De chratzet sech o d Janine überall. U de chratze sech alli überall. Es isch luschtig wi bi de Schimpanse. D Yschaltquote schnellt wider i d Höchi u d Tamedia-Aktie äbefalls. D Lüt hocke wider vor ihrne Fernseh, chlopfe sech uf d Schänkle vor Fröid, stampfe u mööge vor Begeischterig u wälze sech vor Lachen uf de Teppeche. Di einte chratze sech us Solidarität mit, di andere gö i Zoohandligen u choufe grossmuuligi Tiefstichflöh.

D Printmedie zieh nache. D Lüt wei alls wüssen über Flöh. D "Schwyzer Familie" porträtiert e Flohzirkusdiräkter. D "Annabelle" bringt e Reportagen über Flöh im Frauenalltag. D "Sunntigs-Zitig" macht es grosses Interview mit em Flohchünig Picpic III. "Finanz u Wirtschaft" analysiert dr Flohmarktwärt vor Tamedia-Aktie. Im "Spick" cha men e heiteri Gschicht über Flöh u Lehrerinne läse. "Facts" weiss, dass o im Bundesratszimmer mit grossmuulige Tiefstichflöh Politik gmacht wird. Im "Tages-Azeiger" schribt dr Chefredakter e Leitartikel über Konzärnjournalimus, erwähnt dr grossmuulig Tiefstichfloh aber numen am Rand.

Underdesse wird's im "Big Brother" immer luschtiger. Alle chratzen enand itz gägesytig überall. Als nächschte mues dr Remo ga, wil er e Floh halb z tod gschlage het. Gscheht em rächt. D Yschaltquoten u d Tamedia-Aktie chlättere wyter. Dr Wildbärger isch zfriede. Dr Coninx u si ganzi Familie si glücklech.

Bi Schwyzer Fernseh DRS bilde si e Krisestab. Dr Filippo Leutenegger versuecht's ir "Arena" mit wysse Müüs. Aber dr Erfolg blybt bescheide. Numen e graui Muus vor CVP gheit i Ohnmacht.

Wie d Lüt bir Stange bhalte - das isch ds Problem vo jedem Privatfernseh. Ds bewährtischte Rezäpt heisst - Sex.

Uf dr Foto gseht si uus wi d Prinzässin Stefanie vo Monaco i ihrne bessere Zyte, aber si isch nid blaublüetig, nid emal seignant, ender bien cuit, d Strippi Paella, di nöie Moderatorin vom Telebärn-Erotikmagazin, die, wo d Cordula Cordon-Bleu ersetzt het.

U wil men als kritische Journalischt chli sött im Bild sy über das, wo uf de Fernsehkanäl so louft, han i unbeabsichtiget mal so i nes Erotikmagazin ynegluegt. Zersch hei si e Strassenumfrag gmacht über d Farb vo den Underhose. Eine het gseit schwarz mit rote Schalldämpfer u öb er o no dörf säge, was er drunder anne heig. En andere het gseit vore gälb u hinde bruun u itz wett er für ds Fernseh no chli ir Nase grüble.

Drufabe het sech eini abzogen u isch uf so nes Louis-Toujours-Kanapee gläge mit eme Hüehnerscheichli im Mu u ere Tomate i dr Hand u het bhouptet, si sig itz es Kunschtwärk. U de sy si eine vom Kunschtmuseum ga hole u hei ne gfragt, öb das würklech es Kunschtwärk sig, u de het dä gseit, ja, es chönnt e späte Picasso sy, da wüss me mängisch o nid, weles dr Gring sig u weles ds Füdle, u de isch die, wo bhouptet het, si sig es Kunschtwärk, so verruckt worde, dass si dr Arm glüpft u dä vom Kunstmuseum aabislet het.

U de isch so ne Videoclip cho mit zwöine, wo o wider blutt sy gsi, warum, weiss niemer, we si nid blutt wäre gsi, hätt me chönne meine, dass sig e nöii olympischi Disziplin, öppis zwüsche Synchronschwimmen u Freistilringe.

Tilsiter - Gnuess hoch zwäi. Tilsiter überchömet Si zum Aktionsprys i ihrem Coop. Tilsiter - Gnuss hoch zwäi.

Nach dr Wärbig hei si de nomal e Strassenumfrag macht über pssssssst. Si hei d Lüt gfragt, öb si o scho mal mit eme pssssssssst im ene psssssssst e pssssssst gha heige. Teil Lüt hei gseit psssssssst, teil sogar pssssssst. Das isch also scho chli unaaständig gsi. Für ds MAZ han i das müesse zensuriere.

Nächhär isch de no öppis cho über Sado/Maso - was genau, weis i nümm, jedefalls het's mi dünkt, das wär ender öppis gsi für d Tagesschou.

Zum Schluss hei si de no ne Widerholig bracht: D Strippi Paella, wo im Bellevue us de Händ vom Charles von Graffenried dr Albert-P.-Stäheli-Prys für di beschti Erotiksändig im zytgenössische Fernsehschaffe het dörfe entgäge näh.

Bim "Bund", das isch die Zytig z Bärn, wo derfür sorget, dass d Gwinne vor NZZ nid i ds Unermässleche wachse, bim "Bund" hei si e nöie Chefredakter.

Uf dr Foto gseht er uus wi ne Vorarbeiter im ene ostpolnische Bruunchohlebärgwärk, aber er heisst weder Sporikofski no Spörefski, er heisst nume Spörri u isch dr nöi Chefredakter vom "Bund". Es Unikum ir nöiere Bärner Mediegschicht, wil är cha beides, läsen u schrybe. Di zwe letzschte Chefredaktore vom "Bund" chöi nume schryben, aber nid läse. Dr eint isch dr Ziegler gsi, dä hätt wölle Profässer wärde, aber z Bärn wird kene Profässer, wo nume cha schrybe, aber nid läse. Itz isch er zwar glych Profässer worde, aber nume z Amerika äne, dört längt e gültige Fahruswys.

Dr Chefredakter vor BZ, dä cha nume läsen, aber nid schryben u wenn er's glych öppe mal versuecht, de dünkt's eim, itz chönn me sälber nümm läse. Dr früecher Chefredakter vor BZ, dä het nid chönne läsen u nid chönne schrybe, aber är het chönne bös dryluege. (Das isch dr Hurni gsi, dä tüeg itz ir Toskana Olivenöl abfülle, seit me.) So cha dr eint ds einte, aber ds andere nid, u dr ander ds andere, aber ds einte nid, u mängisch chöi si beides nid.

Dr itzig Chefredakter vor BZ, das isch dr Z'graggen, dä cha zwar nid schrybe, aber läse, u de chan er no öppis: ganz schön dahocke. U wenn er so dahocket mit sine Gescht im "Telebärn", de dänkt me, kene cha so schön dahocke wi dä, u mi wett stundelang zueluege, wi schön dä dahocket. Im "Telebärn" hei si's gäbig, da chöi si eifach so dahocke. Nume dä vom Sport mues dastah, das isch schwiriger, wil da gsäch me's, wenn er kes Rückgrat hätt, we nach em Hals grad ds Füdle chiem, das gsäch me, aber bi dene, wo dahocke, gsäch me's nid, we's eso wär.

Aber es isch nid eso, ämu bim Chefredakter vor BZ nid, dä het wahrschynlech es Rückgrat, wil süsch gieng's mit dr BZ nid gäng obsi. Hoffe wei mer, dass es vo itz a o mit em "Bund" obsi geit, wil si dä Spörri hei, e Chefredakter, wo cha läsen u schrybe. Sicher aber isch es nid. Wil mit Läsen u Schryben alei isch's de o no nid gmacht.

D Journalischtinne u Journalischte sötte sech ihrer Verantwortig eifach o chli meh bewusst si, wil mit verantwortigsloser Schriberei cha me verdiente Lüt schwär Unrächt tue. Eine, wo gäng wider dr Finger uf dä wund Punkt leit, isch dr Oberholzer.

Uf dr Foto gseht er uus wi dr Röbi Gröbeli, dr Altmeischter under de Schwyzer Wärber, dä wo 1978 füre Slogan "Katzen würden Whiskas kaufen" dr Gross Kulturprys vom Kanton Aargou übercho het, aber es isch nid dr Gröbeli, dä isch lengschtens uf de Bahamas, es isch dr Oberholzer, Kommunikationsberater bi Präsenz Schwyz, dr Wärbebude vom Matyassi, u dört zueständig für d Marktanalyse. Ir Schwyz, seit dr Oberholzer, git's eis Problem, das isch aber o ds einzige, nämlech das, dass d Medie ds Wysse Schwarz malen u ds Schwarze wyss.

Nähmet zum Byspil dä Daniel Affolter, seit dr Oberholzer, dä Affolter, wo dür d Medie gschleipft worden isch, als hätt er silberigi Löffeli gstole. Da chrüpplet sech eine für dä Kunoni halb kabutt u laht de o no d Frou la mitchrüpple u de missgönne nem d Medie di paar Milliönli, won er sech uf ds eigete Konto gschobe het. Wi isch das ungrächt.

Oder nähmet di drei Cheffe vor Bank Vontobel, seit dr Oberholzer, wo nümm so rächt hei chönnen unterscheide zwüschen ihrem Gäld u däm vor Bank, das cha doch passiere, we me bire Bank schaffet u 's dr lieb läng Tag mit Gäld z tüe het, aber d Medie chöi das nid verstah, derby het doch scho dr Brecht gseit, e Bank z gründe sig schlimmer als eini z plündere, aber das wott de Medie nid ine.

Oder dä Peter Hess, seit dr Oberholzer, wo i de Medie wi ne Hurlibueb behandlet worden isch, derby isch's doch nüt als rächt, dass o d Briefchaschtefirme mal dr Nationalratspresidänt dörfe stelle, di si lengschtens stercher als jedi Bundesratspartei u wärde itz de no stercher, wil nach dr elfte AHV-Revision o jedi Früehräntnere u jede Früehräntner e Briefchaschtefirma mues ha, für d Stüüre z optimiere.

Uf dr andere Syte, seit dr Oberholzer, zeige d Medie ungloublech vil Verständnis für alles Unschwyzerische, für di Chrankeschwöschtere zum Byspil, wo meine, si verdieni z wenig, u nüt gschiders wüssen als z demonstriere. U ke einzige Journalischt, seit dr Oberholzer, git dene Chrankeschwöschtere z verstah, dass ir Schwyz z Diene gäng no vor em Verdiene chunnt.

U no i öppis anderem zeigt sech d Brutalität vo de Medie: E Zytlang bisch dr Siech u plötzlech bisch wäg vom Fänschter.

Uf de Foto het er usgseh wi dr Peter Ramseier, dä, wo d "Schwyzer Illuschtrierti" zum Mann des Jahres gwählt het, en ussergwöhnleche Ma, vieredrissgi, Velomechaniker, zwöi Chind, no nid gschide, Hobby Wandere u Jasse, Lieblingsässe Bratwurscht mit Röschti, im Militär Wachtmeischter bi de Radfahrer, alls eifach total ussergwöhnlech, dä het dr Titel Mann des Jahres verdienet, u mir fröien üs, das mer nem itz all Wuchen ir "Schwyzer Illuschtrierte" dörfe begägne.

Aber wi heisst itz dä, wo usgseh het wi dr Ramseier, wi heisst itz dä, heitere Fahne. Mi het nen äben itz scho sit eme Zytli nümm gseh, aber früecher, wo me ne gäng gseh het, het ne jedes Chind gkennt. Är het usgseh wi dr Ramseier, aber isch nid Velomechaniker gsi, was cheibs isch er itz o gsi, er mues öppis gsi sy im Sport oder i dr Unterhaltigsbranche u im Militär isch er o öppis gsi. Wi heisst itz dä? Är isch ganz e sympathische Typ gsi, di halbi Wält het ne gkennt, dr Mitterand, dr Kofi Anan, dr Prinz Charles si ne cho bsueche. Är isch o ganz e Luschtige gsi, mal het er Eier gkochet, fraget mi nid wiso, aber luschtig isch es gsi, überall won er gsi isch het Fröide gherrscht. Wi heisst itz dä, heitere Fahne?

Süsch vergissen i d Näme vo dene Promis nie. Dä wo im Big Brother zwöimal i ds Bett bislet het u itz Reklame macht für Pämpers, dä heisst Bruno Bislin. Dä, wo im Match gäge GC dr Schiedsrichter i ds Bei bisse het u am nächschte Tag i dr "Sunntigs-Zytig" cho isch, füdleblutt uf eme Tigerfäll, dä heisst Hugo Bissig.

Die, wo im Fernsehwätterbricht d Wölkli rosarot yfärbt u wo dr "Blick" gäng so schön über se gschribe het, "Wetterfee trinkt Tee im Schnee", "Wetterfee sitzt gern am See", bis ere mal es Wölkli abegheit isch u dr "Blick" itz all Tag schrybt "He, Wetterfee, geh weg vom Fernseh", die heisst Eva Wettermacher.

Wie aber heisst dä, wo usgseh het wi dr Ramseier, heitere Fahne? 's chunnt mer eifach nümm i Sinn. D Wält vo de Promis isch ungrächt: Bekannt wird me, we men a ds richtigen Ort härebislet. Vergässen isch me, we men öppis gsi isch u 's itz nümm isch. Da chönnt me Bundespresidänt gsi sy.

Ir nächschte Gschicht, dere vom Urs Wälchli, chunnt e Zahl vor, 432, u di isch nid erfunde.

Uf dr Foto gseht er uus wi dr Daniel Eckmann oder dr Oswald Sigg, di Wräber ir Bundesverwaltig gseh all öppe glych uus, nämlech zimlech stromlinieförmig, u so gseht o dr Urs Wälchli uus, dr Chef vor Sektion für bsunderi Ufgabe im BSF, em Bundesamt für Schönfärberei, das isch das Amt, wo si d Arbeit vo de 432 eidgenössische Informationsbeuftreite inspiriere, koordiniere u nivelliere u derzue de o no bsunderi Ufgaben erledige.

Im BSF verdienet dr Wälchli ds Dopple vo däm, wo ner vorhär bim Facts verdienet het, u mues nume no d Hälfti schaffe. Bim Facts het er sech alli Gschichte sälber müessen us de Finger suge, itz sugt sech se irgend e Bundesrat us de Finger un är mues se nume no zuespitze. Bim Facts het er alls müessen ufblasen u no meh ufblase, bis em d Lunge zum Hals us ghanget isch, itz mues er nume Luft ablah, u das geit vil ringer.

Di Informationsbeuftreite müesse de Lüt säge, das alls nume halb so schlimm sig oder sogar no besser, das es scho guet chömm, we dr Glouben a Bundesrat gross gnue sig, u das me sech a d Problem, wo me nid chönn löse, mües gwöhne, für das me se chönn vergässe.

So, wi di Informationsbeuftreite alls chli chliner mache als es isch, so mues dr Wälchli itz o d Näme vo de Bundesrät chliner mache, für das d Lüt nid scho erchlüpfe, we si nume dr Name vom ene Bundesrat ghöre.

Wär Schmid ghört, dä dänkt a di 30 Milliarde, wo d Armee i de nächschte Jahr söll choschte, u dänkt, dä spinni, dä Schmid. Drum heisst dr Schmid vo itz a Schmidli, u d Lüt dänke nümm a di 30 Milliarde, sondern nume no a di drei Millione, wo's würd choschte, we me dr Train nid würd abschaffe u d Brieftübeler wider würd yfüehre, u de dänke d Lüt, das sig itz ämu o no ne sympathische Bundesrat, dä Schmidli.

Bim Deiss, seit dr Wälchli, da hei mer ds Problem mit däm herte Doppelvokal, ei, da chunnt eim, öb me wott oder nid, d Shawne Fielding i Sinn, u das isch nid guet für ne Usseminischter, drum heisst dr Deiss itz Dysli.

Dr Frou Dreifuss het dr Wälchli zersch Frou Zwöihänder wölle säge, aber das isch gäng no chli abschreckend, drum heisst si itz Frou Eibei, das erinneret eim a nes Mälcherstüehli, u da cha niemer dergäge sy.

Dr Villiger heisst nöierdings Weniger, wil er ja nid vil, sondern weniger Problem wett mit dr Gäldwäscherei, dr Couchepin Couchebien, da sy alli froh, we dä nid z aktiv würkt, em Leuenberger het dr Wälchli dr Name Chatzebuggler gä, das charakterisiert si zrügghaltendi Art vil besser. Nume d Frou Metzler cha me nid verchlinere, seit dr Wälchli, süsch isch plötzlech überhoupt nümm da.

Eis vo de ganz grosse Medienereignis i däm Jahr: d Swissair. Luege mer i di letschti Verwaltigsratssitzig ine vom alte Swissair-Verwaltigsrat.

Uf dr Foto gseh si luschtig uus mit de Suurstoffmasken uf de Nasen u de Schwümmweste über de Gravatte, und o i Würklechkeit isch es es luschtigs Grüppeli, dä Swissair-Verwaltigsrat. Itz näh me si d Stüürchnüppel-Attrappe i d Händ u schnalle sech d Outopiloten uf d Stirne u de stelle si d Sitzlähne grad u gurte sech aa u hören uf rouke u überchöme füechtig Händ u Härzchlopfen u d Stüürchnüppel-Attrappe fö afe zittere.

U de seit dr Honegger: D Sitzig isch eröffnet u i ha scho gäng gseit, d Flügel sige z läng, di Flugzüüg sötte chürzeri Flügel ha. U de seit dr Schmidheini: 's wott mer eifach nid i mi Betonchopf, warum di Flügzüüg chürzeri Flügel sötte ha. U de seit dr Stählin: I bi o für chürzeri Flügel, aber mi sött de o no Kerosin spare, drum stellet äntlech di Propäller ab. U de seit dr Mühlemann: Mi sött eifach chli vernetzter dänke, was mer bir Swissair verliere, hole mer bir Credit Suisse wider ine. U de seit d Vreni Spoerry, wo gäng e gsunde freisinnige Optimismus verbreitet: 's isch doch alls nume halb so schlimm, uf 40 Verwaltigsratsmandat eis fuuls Ei, das sött's doch no möge verlide. U de seit dr Corti: Flüge chönnt me zur Not ja o mit dr Lufthansa. U de seit dr Stähelin: Weiss öpper, wi läng d Flügel bi dene sy? Aber niemer weiss es. Vilecht wüsste's di andere Verwaltigsrät, aber di si a andere Verwaltigsratssitzige.

U de seit dr Honegger: Wei mer itz di Flügel stutzen oder nid? U de seit dr Corti, wo bi Nestlé ds Hunde- u Chatzefueter under sech het: Bir Bordverpflegig chönnt me de o no spare. U de seit d Vreni Spoerry: Da gseht me wider, wi wichtig Synergiee si ir Wirtschaft. U de seit dr Schmidheini: I bi eifach nid für chürzeri Flügel. U de seit dr Stähelin: Itz stellet äntlech di Propäller ab. So het dr Verwaltigsrat alli Optione sorgfältig prüeft, u ei Option het em de schliesslech yglüchtet: Zrüggträte. Nume dr Corti darf blybe, wil er gmerkt het, das me bir Bordverpflegig no cha spare.

U d Beatrice Tschanz, wo usgseht wi ne Hoschtess, aber ender e Hüscht- u Hotesse isch, seit am Aben ir Tagesschou, mi wöll itz de Flügzüüg d Flügel stutzen oder o nid u morn sig alls wider ganz anders, aber es chömm uf all Fäll guet mit dr Swissair. Im übrige suech me nöii Verwaltigsrät: Wär freisinnig sig, scho i mindischtens 30 Verwaltigsrät hocki u nid Angscht heig vor em Flüge - vor em wider us em Verwaltigsrat useflüge - söll so guet si u sech mälde.

Eine vo dene Schwyzer, wo ni am meischte bewundere, isch dr Moritz Leuenberger. Tief beidruckt het mi si hüürigi 1.-Ougschte-Rede. Er het o lang drann gschaffet.

Uf dr Foto, dünkt's ne, gsäch er uus wi dr Aristoteles, mit em Hugo-Boss-Hemmli u dr Armani-Gravatte, i Würklechkeit isch er Bundesrat, dr Moritz Leuenberger, dr Philosoph under de Bundesrät, u itz isch er Bundespresidänt u überleit sech, was er i sir Bundesfyrred chönnt säge.

Zersch sött i vilecht öppis Sozialdemokratisches säge, dänkt er, für dass d Lüt wider wüsse, dass i o no Sozialdemokrat bi, u de chunnt em dr Erich Fromm i Sinn, das vom Ha u vom Sy, u de seit er: Ha u Sy isch zwöierlei, we me's het, de isch me's nid u we me's isch, de het me's nid, es sig de, mi heig's u sig's, wi sinerzyt d Madame de Meuron, aber o die het's itz nümm, wil itz isch si tod, u öb si's no isch, das wüsse mer nid. Jedefalls isch's gschider, mi sig's als mi heig's, wil dene, wo's nid hei, cha me's o nid näh. U was de o no wichtig isch: Jammere nützt nume, we me ke Grund het derzue.

Das sötte d Lüt verstande ha, dänkt dr Leuenberger, u itz sött i vilecht no öppis sägen übere Umwältschutz, für dass d Lüt dr Zug nähme u nid ds Outo oder no besser deheime blybe, u de seit er: Komisch, we me hie isch, wett me dört sy, u we me dört isch, merkt me, dass me ja wider hie isch, u de wett me wider dört sy, u we me de dört isch, merkt me, dass me scho wider hie isch u gäng so wyter. Mi geit u geit u we me ggangen isch, merkt me, dass me gäng wider chunnt, wil me sich sälber nid cha dervo loufe. Drum blybet gschider, wo dr syt.

Das han i itz o no gut gseit, dänkt dr Leuenberger, u itz sött i vilecht no öppis sägen über d Unzfriedeheit vo de Lüt u dass si doch chli zfridener sölle si, u de seit er: D Zyt vergeit u vergieng si nid, würde mer säge: Gopfriedstutz, itz isch gäng no hütt, wenn wird's ächt äntlech morn, u we's de äntlech morn worden wär, würde mer säge: Gopfriedstutz, itz isch scho wider hütt, ersch isch no geschter gsi. Gschider wär's, mi nähm's, wi's chiem u würd nid gäng no usehöische.

Das hätt dr Aristoteles chönne gseit ha, dänkt dr Leuenberger, u itz sött i no ne kulturphilosophischi Schlusspointe ha für di 1.-Ougschte-Rede, u de seit er: Ds Verruckten i dere Wält isch, dass es nüt git, wo's nid git. U de dänkt er no chli wyter u seit: We's nüt git, wo's nid git, de mues es doch öppis gä, wo's git - aber was? So chunnt o üse Bundespresidänt Leuenberger a d Gränze vom Dänke. 's isch nümm wi aube bim Ogi.

Grossi Ereignis wärfe ihre Schatte voruus, zum Byspil d Expo.02.

Uf dr Foto gseht si fasch chli uus wi d Nella Martinetti, d Nelly Wenger, und o si sorget derfür, dass sech d Lüt nid müesse geniere, we si a wenig Fröid hei. Kultur mues sy ar Expo, das isch unbestritte, aber nid so vil, das eim d Bratwurscht im Hals blybt stecke.

Ganz im Sinn vor Nella Martinetti isch ds Projekt Instant Happiness, dr Hochzytspavillon, wo d Lüt zum Plousch für 24 Stund chöi hürate. D Bischofskonferänz het zwar gfunde, settigne Eheschliessige fähli dr Wille zur Duurhaftigkeit u dadermit di moralischi Legitimation. Dr Nelly Wenger isch's itz aber glunge, d Expo-Botschaftere Shawne Fielding währet dr ganze Duur vor Expo als Ei-Tags-Ehegattin z verpflichte, u dadermit isch o d Bischofskonferänz beruhiget. Ab sofort cha men a jedem Ticket Corner Billett ha für di Ei-Tags-Ehe. Die erschti Wuchen isch allerdings scho usbuechet: Dr Jean-François Roth, dr Peter Aliesch, dr Kurt Aeschbacher, dr Nicolas Hayek, dr Joseph Deiss, dr Bill Clinton u dr Thomas Borer sy di Glückleche.

D Shawne Fielding fröit sech uf ihri nöii Ufgab. Instant Happiness, het si are Mediekonfränz gseit, sterki dr Zämehalt vor Schwyz u förderi ds Früehänglisch. Und uf d Frag, öb si de nid o gwüssi Bedänke heig, het si gantwortet, we's Problem sött gä, lös si die rasch u ändgültig mit em Unspunnestei. D Houptsponsore für Instant Happiness sy Pfizer AG, die vom Viagra, u ds Bundesamt für Gsundheit, wo o öppen i dere Branche z tüe het. We Instant Happiness zum Grosserfolg sött wärde, chönnte churzfristig o no d Claudia Schiffer u d Heidi Häfeli yspringe, für d Shawne Fielding vor Vilmännerei z bewahre.

Das gfallt de Lüt, seit d Nelly Wenger, aber Kultur söll o sy, schliesslech wie mer mit dr Expo nid nume di dummen Alte aaspräche, sondern o di gschide Junge. Drum verzichte mer uf ds General-Guisan-Stübli u mache statt dessen es Adolf-Muschg-Culturama. Hie chöi sech Intellektuelli u Künstler am ene tägleche Prysusschrybe beteilige. Wär am beschte nachewyst, dass Landesusstellige hüttzutags nümm zytgemäss sy, gwinnt en Expo.02-Duurcharte. Prysrichtere isch d Jacqueline Fendt.

Us Choschtegründ verzichte mer uf di Iris-Katamarane, seit d Nelly Wenger, di hei mer günschtig als Ysbrächer nach Grönland chönne verchoufe. Statt desse requiriere mer d Pedalo-Flotte vo allen Schwyzer Seee. U de setze mer zwo müglechscht unterschiedlechi Pärsone i so nes Pedalo: e Gänfer Agnostiker mit eme Neuapostol us Basel, en Appizäller Sennehundezüchter mit ere Schönheitskünigin us em Napfgebiet, en Industriellegattin us Herrlibärg mit ere Asylbewärbere us Angola, es Tessiner Schlitzohr mit eme Sektionschef us em Bundesamt für Statistik, e Bio-Büüri us em Calancatal mit eme Globilisierigsgägner us em Chräis föif. Di Pedalo-Team trample vo Biel nach Nöieburg u hei d Ufgab, die nöii schwyzerischi Identität z finde. U we si se bis Nöieburg no nid gfunde hei, trample si wyter nach Yverdon u vo dört nach Murte u zrügg nach Biel. U we si di nöii schwyzerischi Identität immer no nid gfunde hei, faht dä Parcouras vo vornen aa.

U de no öppis, seit d Nelly Wenger, d Wärbig für d Expo mues besser wärde. Daderfür hei mer dr Klaus J. Blöhker chönne gwinne, dä, wo scho em Stoubsuger Schnupfdendreck u dr Fägbürschte Liseli zum Siegeszug dür d ganzi Schwyz verhulfe het. Als OK-Presidänt vom Waldfescht im Borkechäferholz kennt dr Blöhker o di bsunderi Dynamik vo Grossveraastaltige.

Übrigens: D Heidi Häfeli, di zwöiti Ersatzfrou bi Instant Happiness, di han i nid öppen erfunde, di git's.

Uf dr Foto het si e Tarotcharte zwüsche de Zähn u ne Bachblüeten i de Haar u ihri Aura lüüchtet rosa u lila, d Aura vor Aurelia Häfeli, wo eigetlech Heidi Häfeli heisst u bis letscht Herbscht mit beidne Bei am Bode gstanden isch: Gschäftsfüehrere vor Vegetarisch-pazifistische Gsellschaft, Vizepresidäntin vor Sektion Oberstadt, Sekretärin vom Arbeiterbildigsusschuss, Mezzosopran ir Singgruppe Linksumkehrt. En Alternativi mit Prinzipie: Birkestöck statt Adidas, Tofu statt Chalbschopf, Muettermilch statt Vaterland.

Aber du isch öppis passiert. Am ene Sunntigmorge im Novämber, bim ene Spaziergang ar Aare, trifft d Heidi Häfeli zuefälligerwys en alti Bekannti us dr Zyt vor Frouebefreiigsbewegig, d Dorli Häberli, wo itz Karma Häberli heisst u scho sit zäh Jahr ihres Schicksal als Chance versteit. D Karma het dr Heidi verzellt, wi me ganzheitlech a sech schaffet, wi me si Wyblechkeit aanimmt, die eigeti Wahrheit läbt u am Bewusstsy Ruum git. Am Wuchenänd druuf si si zäme zum Guru Swami Bami Goreng, hei Rückfüehrigen erläbt bis is Paläozoikum, u uf de glüehige Chohle het d Heidi e wunderschöni Aura Soma überchoo u vo itz a Aurelia gheisse.

Hütt isch d Aurelia Häfeli mit sich sälber im Reine u o brueflech louft's prima. Si bietet nöierdings Therapien aa mit em Energiebündler - das isch e magisch-magnetischen Apparat, wo d Chreft us de früechere Läben im gägewärtigen Ich kreativ numerologisiert u spirituell zuespitzt. E Behandlig choschtet 100 Franke, aber wär zäh im voruus zahlt, überchunnt se für 900. D Aurelia het ihri politischen Ämter ufgäh u o i d Singgruppe geit si nümm.

Mir chöme zum Schluss. Ändi Ougschte tritt eine zrügg, wo's verdienet, dass mer o hie churz a ne dänke, wil er o üs Medielüt vil z säge gha het.

Uf dr Foto gseht er uus wi dr Don Quichote, wo gäge d Windmühline kämpft, u öppis eso isch er o gsi, dr zurückträtend Dateschutzbeuftreit Odilo Guntern. Mit em Muet vor Verzwyflig het er gäge Missbruch vo Date kämpft, derby aber nie ganz begriffe, dass me nid d Date mues schütze, sondern d Mönsche, u je weniger, dass me d Date schützt, umso meh schützt me d Mönsche.

Näh mer als Byspil d Videoüberwachig. Da louft eine über e Bahnhofplatz u wird pär Video überwacht, u wenn er's wüsst, hätt er nüt dergäge, wil er scho lang gärn mal im Fernseh cho wär. Uf dr Polizei luege si, wi dä über e Bahnhofplatz louft, u plötzlech gseh si, wi nen andere däm ds Portemonnaie us dr Hosetäsche chlauet. Oha lätz, seit dr Polizeikorporal, itz müesse mer uf d Pischte. U de gö si u verhafte dä, wo über e Bahnhofplatz gloffen isch, wil es chönnt ja en Ussländer sy, u mittellosi Ussländer wei me nid ir Schwyz, aber wil's e Schwyzer isch, lö si ne wider la loufe, gäben em vorhär no eis u ds Dach mit em Gummichnüppel u säge nem, er söll gfäligscht besser uf sis Portemonnaie ufpasse. A däm Byspil gseh mer, wi's d Taschediebe dank dr Videoüberwachig nümm so liecht hei.

Bi schwerere Delikt nimmt me d DNA-Analyse z Hilf. Am ene Roubmörder oder Chinderschänder zum Byspil mues me nümm müehsam bewyse, dass er's gsi isch. Mi cha eifach alli andere uffordere, mit ere DNA-Analyse z bewyse, dass si's nid gsi si. We de eine das nid cha bewyse, de isch er's gsi u de het me ne. So eifach isch das hüttzutags.

Es wyters Byspil derfür, wi sägensrych dr frei Informationsfluss cha sy: Mit de Chrankekassedate uf dr Cumuluscharte cha me Läbe rette. Wen e Visana-Versicherete, wo wäg em Härz chli sött ufpasse, ar Migros-Kasse steit u d Cumuluscharte laht la regischtriere, de nimmt's em outomatisch d Bratwürscht u dr Vollfettchäs us em Chörbli u gheit em e Bio-Salat u nes Magerquark dri. Das isch Dienst ar Gsundheit vom Chund, u we das nüt sött nütze, müsst me d Date vor Visana mit dene vor Stüürverwaltig zämeschliesse, für chönne z beurteile, öb di Härzoperation no räntiert.

Das isch ja alls guet u rächt, dänkt dr Odilo Guntern, aber glychwohl sött me dr Dateschutz nid grad ganz vergässe. Ei heisse Tip wett er schliesslech de Dozäntinne u Dozänte vom MAZ zum Abschied no mitgäh: Tüet öie Computer numen abstoube u nid shamponiere, wil da chönnt's gheimi Date useschwemme.

Das wär's gsi. Wenn öpper no nid gnue sött ha, de erloubi mer, dere oder däm mitzteile, das es itz o nes Büechli git mit Satire vo mir, "Schnappschüss". Es choschtet 28 Franke u het 158 Syte. Dr Syteprys liegt also bi 17,7 Rappe, u das dünkt mi nid überhöische, i ha scho Büecher gkouft mit eme Syteprys vo 25 u meh Rappe. Mi chönnt das Büechli bschtelle, uf dene blaue Zeddle, un es würd eim de portofrei zuegschickt, allerdings nume mit B-Poscht. Wenn öpper e Widmig sött wünsche, de chönnt me eifach no ne grosse W uf di Bschtellig schrybe. Wär nume ne Widmig ohni Buech wott, schrybt WoB, das wär de gratis.

Eine Auswahl aus Däpps Satiren, die zwischen 1994 und 2000 im Berner Regionaljournal von SR DRS ausgestrahlt wurden, sind in Buchform erschienen:

Heinz Däpp
Schnappschüss - Satiren us em Radio
Fischer Media, Bern. 160 Seiten, ISBN 3-85681-467-1, CHF 28.-

Direktbestellung beim Autor: daepp@datacomm.ch

Copyright © MAZ